美股繼續急跌，又要繼續做隻閘蟹喇 

尋日去咗劉太的生日聚會，食的嘢同星期二完全一樣，已經冇咗一種興奮的感覺喇，不過味道仍然係好好味．．．劉太心情都幾好喎，不過今年就冇利是收喇，而寫字樓亦冇安排買禮物，咁即係醫生們都唔需要出錢買禮物啦，唔通經濟差真係會影響購物的意欲 ?! 

上網睇到元朗有一間賣畫同畫框的地方，諗住都要親身到元朗一行，睇一睇ｄ畫框，上網 send 咗個 email 俾佢地 ga la，問一問要幾多錢囉，表起我張名畫響渡假屋裡面，諗起都好開心呀 

囡囡尋晚好攰喎，我同佢傾咗唔係好耐囉，今晚睇吓有冇時間傾耐ｄ啦 

今日又要去應酬喇，事關阿太生日設宴，唔知今年要唔要俾錢買禮物呢 ?!  同埋今年佢會回幾多錢利是呢 ?  今日就會知道喇  

尋日同囡囡傾談談"囡"囡的情況，放心喎，唔好諗太多無謂嘢呀 

原本今日心情應該好好 ga，不過美股急跌令我心情不佳，因為又要做咗一隻大閘蟹呀 

傾談事宜有少少突破，不過仲未落實，肯定冇預期之中咁好 ga la，過檔係另一個選擇，暫時都係要考慮清楚，因為出面人工都仲係唔錯喎 

尋日下午去稻香食飯，好好味呀，有好多好嘢食，今次係食咗咁多次之中最好食的頭一二位呀，不過堂書就真係悶咗ｄ，講美容講激光，我都唔理佢咁多一味狂食，哈哈，真係好開心呀．．．食食吓，電話一響，原來已經入咗貨，再過一陣，電話又響，今之係母親大人打俾我，講俾我知股市跌咗好多，叫我如果可以的話快ｄ返診所準備，點都好啦，尋晚美股升，今日我一定要放晒尋日買的股，獲利即走，因為今晚美股一定有回套呀 

今日涼返好多，所以著咗件囡囡送俾我的羊毛背心，好暖呀，真係好開心呀，聽日可能仲會再凍ｄ，真係要小心著涼呀 

囡囡擔心我會去外國讀書喎，唔駛擔心喎，因為就算去都係好快返番黎呀，更何況香港都好似有得考，再加上我又仲未報名，唔好為咗一ｄ小事而唔開心啦 

今個星期二同星期四的下午都冇得返屋企食媽咪飯喇，因為要去眾會同阿太生日囉，可能臨近生日的關係，阿太心情都好似幾好喎，咁都好，大家有計傾吓嘛 

尋晚有兩件好開心的事呀，攪到瞓得唔係咁好，希望一切順利啦 

囡囡連續兩日追車狂奔，我咪叫佢唔好咁趕時間，因為咁會影響身體呀，希望佢真係會接受我的意見啦 

今晚可能會去荃灣慶祝同行街，不過要視乎時間同體力的負荷先得，如果太攰，可能都係早d 返屋企瞓覺仲好呀 

尋日渡假屋整咗燈飾喇，好靚呀，好鐘意呀，終於都有一個優閑的地方同屋企人享受一吓人生喇，希望大家以後都咁快樂啦 

整好晒ｄ靚燈飾之後，我大佬帶埋我地睇吓渡假屋的走火通道，上咗天台同隔火層一遊，不過攪到囡囡影唔到光線充足的靚景囉，真係唔好意思喇，不過都影咗好多啦，又唔駛咁介懷呀 

影完相，原本諗住去食上海嘢 ga，不過太唔抵食喇，又要等好耐，都係遲ｄ有機會先試吓啦，最後都係響羊城食飯，好好味呀，一家人都真係食得好開心呀，最正就係果個羊腩煲，真係一試難忘呀 

我知囡囡都好攰呀，山長水遠入黎搵我地，希望佢唔好介意啦，星期六同妳影番多ｄ靚相補數啦 

尋日去科大參加囡囡的畢業典禮，感覺都幾好吖，雖然比較悶咗少少，不過可以見到囡囡上台的一刻真係咩都值返晒啦．．．

尋日見到囡囡一家人啦，佢的朋友仔啦，仲有好多其他唔識的人添，影咗少少相 ja，因為下個星期六都要再去科大影相，到時先慢慢影啦，哈哈 

睇完個頒獎典禮之後，有自助餐食喎，不過太多人喇，最後都係冇咩點食，我淨係飲咗兩杯橙汁 ja，咁都好過冇啦 

離開科大果時勁多人呀，不過又唔駛排好耐就到我地上車喇，可能因為有好多車的關係啦，話咁快就到咗坑口地鐵站，響果度的一間酒樓食飯，都幾好食喎，價錢又唔貴，今次係囡囡請佢一家人同我食 ga，真係好開心呀 

今日好開心呀，因為美股同英磅都大跌，英磅要黎報名讀書 ga，宜家咁跌法，讀果個 course 都可以慳返成皮嘢呀，哈哈 

囡囡宜家又好似冇咩事喇喎，不過仲有喉嚨痕同少少沙聲，希望佢快ｄ好返啦，因為聽日要同佢影碩士畢業相呀 

最新果個姑娘做嘢都 ok 喎，可能佢之前響其他診所做過的關係啦，所以舊姑娘可以休息一吓，放返幾日假喇，咁都好，因為一踏入十二月就會勁多人黎睇醫生 ga la，而我就會響十二月放埋餘下的假期，keke ...

囡囡今朝早打黎話喉嚨唔舒服呀，好攰添，所以今日冇返工喎，希望佢快ｄ睇醫生啦，因為病咗星期五就冇得影相 ga la 

今日已經冇再頭痛喇，尋晚我好夜瞓添，因為上網睇 video 同聽歌，聽到好興奮呀，好耐都冇試過咁的生活喇，真係令人回味 

尋日母親大人生日真係食咗好多嘢呀，午餐 Pizza 啦，兩個人食三人餐都唔好話唔豪呀，之後 Yuki 又買咗個蛋糕上黎，再夜ｄ又飲糖水．．．囡囡中午又響電話祝我母親大人生日快樂，哈哈，原來母親大人的地位都好崇高喎 

病人依排真係多咗好多，可能係天氣轉涼有關，流感都多咗，希望新的姑娘們可以應付得到啦 

今日母親大人生日，希望佢身體健康，開開心心啦，我一陣會同佢食午餐，食 Pizza，叫兩個餐有一個餐送，因為有 coupon 囉，食完之後就返屋企瞓覺覺豬 

尋日終於有糧出喇，足足遲咗三日，事關會計話幫我入票果時銀行已經 cut 數喎，不過算啦，佢下次早ｄ入票咪唔會攪成咁啦，好在今次都係有紀錄以來第二次遲出糧姐 

今日又黎咗一個新姑娘喎，嘩．．．仲咩有咁多姑娘響我間診所出現 ga，唔通依間舖真係幫阿太搵到好多錢 ??  哈哈．．．可能佢都係黎 train 吓姐 

囡囡尋晚提我星期五要同佢影畢業相，我假期都攞咗喇，點會唔記得喎，星期五上午仲會攞埋新的智能住户卡添，囡囡都有一張 ga，攞完之後就會出去搵囡囡 ga la，唔知佢會唔會同我一齊食 lunch 呢 ?! 

今日起身有少少頭痛，食咗粒藥之後又冇咩嘢喎，希望唔係病啦，可能只係尋晚父親大人沖咗ｄ洋參茶俾我飲，飲到好精神瞓得唔好，仲有埋頭痛添，一陣同母親大人食完 lunch 一於早ｄ返番屋企休息一吓呀 

今朝的天氣突然間轉涼咗好多，要著埋風褸返工先夠暖呀，我最鍾意涼快的天氣呀，所以宜家的天氣覺得好舒服囉 

尋日係 AIM 考試的日子，份卷都算係咁啦，冇好似 DFM 咁問埋ｄ超無聊的嘢， 總算鬆咗一口氣，今年最煩的事仲未解決，就係簽約一事，我都打算依一兩個星期要攪掂佢 ga la 

考完試之後，同囡囡去旺角食晚飯，我地尋日唔係見咗好耐呀，因為我考完試都已經成六點半喇，出到去成七點鐘都有呀，未食嘢之前響 "沙X王" 入面傾咗好耐計，傾到連 waiter 都問我地點咗菜未喎．．．食完嘢之後，買咗對拖鞋同一件毛毛外套俾囡囡，佢好開心呀，希望佢遲ｄ著俾我睇啦